246 Awrora
Фотосурет: Gov
Қарулы күштердің әскери қызметшілері соғыс ардагерін 101 жасқа келуімен құттықтады, деп хабарлайды DKNews.kz.
Сағадат Нұрмағамбетов атындағы Құрлық әскерлері әскери институтының курсанттары мен Алматы қаласы Алмалы ауданы қорғаныс істері жөніндегі басқармасының өкілдері Ұлы Отан соғысының ардагері Зұлхарнай Сейітовті 101 жасқа толған туған күнімен құттықтады.
Сталинград шайқасында қан төккен қарт майдангер Белоруссия мен Польшаны жаудан азат еткен. Берлинге жетіп, Потсдам көшелерін минадан тазартуға қатысқан.
Қонақтарға ризашылығын білдірген туған күн иесі жастарға ақ батасын берді.
«Бізді ұмытпағандарыңа рахмет. Егде жастағы адамдар үшін мұндай кездесулер мереке. Еліміздің гүлденуін, қазақстандықтардың бейбітшілік пен келісімде өмір сүруін армандаймын. Ал болашақ офицерлерге генерал болып, Отанымыздың игілігі үшін қызмет етуді тілеймін» Зұлхарнай Сейітов
Ардагер 1922 жылы 27 желтоқсанда Омбы облысы, Жаңа Қыпшақ ауылында дүниеге келген. 1942 жылы Қызыл Армия қатарына шақырылып, Свердловск облысындағы Туринск қаласына әскери іс бойынша оқуға жіберіледі. Сол жылы ол Ленинград майданына аттанып, онда 2-ші екпінді армия құрамында басқыншылармен шайқасты.
Кейіннен сапер курстары бойынша арнайы дайындықтан өтеді. Диверсанттар мен тәртіп сақшыларының маңызды жауынгерлік жұмысын атқарған қызметтік иттермен ол Сталинградтан Белоруссия мен Польша арқылы өтіп, Берлинге жасалған шабуылға қатысады.
Майдангердің жауынгерлік еңбегі «Қызыл Жұлдыз», II дәрежелі «Отан соғысы» ордендерімен, «Сталинградты қорғағаны үшін», «Ерлігі үшін», «1941-1945 жылдардағы Ұлы Отан соғысындағы ерен еңбегі үшін» медальдарымен марапатталған.
Соғыстан кейін Зұлхарнай Сейітов Омбы ауыл шаруашылығы институтын бітіріп, Қазақстанға жіберіледі. Мұнда ол биология ғылымдарының докторы және академик болды. Әріптестерімен бірге «Қазақ бальзамы» және «Алтынсу» емдік сусындарын әзірлеуге қатысты. Қымыз, шұбат, бие және түйе сүтін құрғақ дайындау технологияларын жасады.
Еңбек сіңірген ғылым қайраткері Зұлхарнай Сейітов 150-ден астам ғылыми жұмыстар мен монографиялардың, 14 патент пен 8 авторлық куәліктің, 10 оқу құралының, оның ішінде қазақ, орыс және ағылшын тілдеріндегі «Биохимия» оқулығының авторы. Оның көптеген әзірлемелері мен жаңалықтары бүгінде медицинада да, тамақ өнеркәсібінде де кеңінен қолданылады.
Источник: qazaq.asia
