189 rob
Фотосурет: ҚР ҰҰ баспасөз қызметі
Елімізде әскери борышын өтеп келген жастарға әлеуметтік жеңілдік көрсетілетінін және қолына қару ұстап, тәртіптің қыр-сырына көндіккен жастарға жұмыс берушілердің қатары көп екенін білеміз.
Оның үстіне отан алдындағы борышын өтеп келген сарбаздарға жоғары оқу орындарына түсуге жеңілдіктер қарастырылып және бұған қатысты тиісті бағдарламаларда дайындалған. Сөзімізге дәлел ретінде күні кеше ғана әскер қатарына күзде шақырылған сарбаздар үшін 1500 грант бөлінді. Соның 700-ден астамы Қорғаныс министрлігі, 600-ден астамы Ұлттық ұлан, қалғаны Ұлттық қауіпсіздік комитеті мен Төтенше жағдайлар министрлігінің жауынгерлеріне табысталды.
Елімізде 2023 жылдың күзгі шақырылым науқаны басталды. Жоғарыда айтылған әлеуметтік көмекті естіген еліміздің жастары әскерге құлшынып өз еркімен келу үстінде. Бүгінде «Батыс» өңірлік қолбасшылығына
қарасты 6655, 5517 әскери бөлімдеріне Отан алдындағы борышын атқаруға өздерінің ерік-жігерімен келген жас сарбаздардың алғашқы легі келді.
Әскери бөлім аумағына жаңадан келген сарбаздарды әскери бөлім жеке құрамы жылы қарсы алды. Әскери бөлімнің табалдырығын жаңа аттаған сарбаздар жан-жағына жалтақтай қарап бойларында қорқыныш сезім ұялағандай сыңай танытып, саптық алаңға қарай беттеп келді. Саптық алаңда болашақ ұландарды бөлім командирі қарсы алып, амандық-саулық сұрасып, әскери бөлімнің атқаратын міндеттері және бөлімнің құрылу тарихымен қысқаша таныстырып өтті. Бөлім командирі өз сөзін аяқтап жас толымды әскери бөлімнің моншасына бағыттады. Болашақ ұландар әскери бөлімнің моншасына келіп, шаш үлгісін бірдей етіп қидырып, жуынып, әскери форма киіп бір үйдің балаларындай болып шыға келді. Осылайша, әскери бөлімге 1 сағат бұрын келген жас жеткіншектердің сарбаздық алғашқы күндері басталып та кетті.
Ұлттық ұлан әскер қатарында әскерге жаңадан келген сарбаздарды әскердің алғашқы күндері әскери өмірге бейімделуге үйретеді. Ол үшін әскери психолог мамандар әскерге келген әр сарбазбен жеке әңгімелесулер жүргізіп жан – жақты зерделеп, психологиялық тестілеу жұмыс-тарын жүргізіп, әрі қарай әскери өмірдің қыр – сырын үйрету мақсатында взвод командирлеріне табыстайды. Сарбазды зерделеу кезінде басты назар білім деңгейіне, мамандығының бар болуына, іскерлік және сипаттамалық қасиетеріне аударылады.
Жоспарға сәйкес жаңадан келген сарбаздар бір ай бойы жас жауынгер курсынан өтіп, әскери өмірге бейімделеді. Жас сарбаздарды әскери қызметке таңдаулы және кәсіби дайындығы жоғары офицерлер мен сержанттар дайындайды.
Ағымдағы бір ай ішінде болашақ ұландықтар мемлекеттік-құқықтық, саптық дайындық, жалпы әскери жарғы, күн тәртібін жаттап білімдерін жетілдіреді. Сонымен қатар жауынгерлік қызметке түсу дағдыларын, ату дайындық тәсілдерін, әскери техникалар мен атыс қаруларын меңгереді. Сол бір ай ішінде алдағы болатын әскери ант қабылдау рәсіміне дайындалады. Осы тұста сарбаздар әскери ант мәтінін жаттап, саптық шерумен орындалатын әндерді айтып жаттығады.
– Әскери бөлімде жас сарбаздардың келуіне барлық жағдай жасалып, оқу пункті құрылды. Бір ай ішінде болашақ ұландар жалпы әскери жарғы, мемлекеттік құқықтық дайындық және жауынгерлік дайындық сабағы бойынша білім алатын болады. Сонымен қатар жас сарбаздар өздеріне қолданысқа берілетін әскери техникалармен, қару-жарақ және басқа да әскери құралдармен танысып, оларды дұрыс қолдану тәсілін үйренеді. Оқу пунктінің соңына қарай психолог мамандарының көмегімен сарбаздардың моральдық психологиялық жай-күйін зерделей отырып, оларды жауынгерлік қызмет атқаратын бөліністерге жібереміз дейді, – оқу пунктінің бастығы майор Дәурен Рахимбеков.
Әскери борыштарын өтеуге келген сарбаздар өздерінің бір жыл қызметтері барысында нағыз шыңдалған ер азамат болып шығатындарына сенімді.
– Отан алдындағы борышымды өтеуге Алматы қаласынан келдім. Бізді әскери бөлім ұжымы жылы қарсы алды. Алғашқы күннен бастап әскери өмір маған ұнап жатыр. Барлық қатарлас достарымды Отан алдындағы борыштарын атқаруға шақырамын деді, – жас толым Нұрбек Жалғасбеков.
Жалпы отанды қорғау патриоттық сезім отбасынан басталып, мектеп қабырғасында шыңдалып, әскер сапында толысатынын білеміз. Бабаларымыз осынау байтақ жерді ақ найзаның ұшымен, ақ білектің күшімен қорғап қалды. Тарихты түгендер болсақ, жастарымызға үлгі боларлық батырларымыз жеткілікті. Ұлттық ұлан әскер қатарына жаңадан қосылған жас сарбаздар ата-баба дәстүрін жалғастыра отырып, өздерінің отан алдындағы борыштарын обыроймен атқаратындығына сеніміміз мол.
Капитан Ертуған Әубәкір, Орал қаласы
Источник: qazaq.asia
