164 rob
Фотосурет: А.Байжұманов / Сенаттың Баспасөз қызмет
Сенаттың Халықаралық қатынастар, қорғаныс және қауіпсіздік комитетінің депутаттары «Жұмылдыру дайындығы, азаматтық және аумақтық қорғаныс саласындағы заңнамалық қамтамасыз етудің өзекті мәселелері» тақырыбы бойынша дөңгелек үстел отырысын өткізді, деп хабарлайды DKNews.kz.
Комитет төрағасы Андрей Лукин мемлекеттің қауіпсіздігі мен қорғаныс қабілетін нығайтуда, атап айтқанда қорғаныс міндеттерін шешуде басқару органдарының, күштер мен құралдардың, бүкіл мемлекеттік қорғаныс жүйесінің дайындығы мәселесінде дөңгелек үстелдің тақырыбы аса маңызды екенін атап өтті.
«Қолданыстағы заңнама қойылған міндеттерді шешуге мүмкіндік береді, сонымен бірге ол тиісті қорғаныс жағдайының дайындығы мен әзірлігі көрсетілген шараларды толық көрсетпейді немесе ашпайды. Сонымен қатар, басқа елдердегі тәжірибелер мен мысалдар нормативтік-құқықтық базаны одан әрі жетілдіру қажеттігі туралы қорытынды жасауға мүмкіндік береді. Оның үстіне Мемлекет басшысы Қасым-Жомарт Тоқаевтың Үкіметке және барлық өңірлердің әкімдеріне аумақтық қорғанысты нығайту жөнінде шаралар қабылдау туралы тапсырмасы бар» Андрей Лукин
Сенаторлар шара барысында жұмылдыру дайындығы, азаматтық және аумақтық қорғаныс саласындағы бірыңғай басқару жүйесін қалыптастыру және дамыту жөніндегі міндеттерді орындау үшін ұйымдастыру-техникалық және өкімдік шаралар қабылдау ғана емес, сондай-ақ тиісті заңнамалық қамтамасыз етудің қажеттігін де атап өтті.
Парламентшілер сонымен қатар қорғаныс министрінің орынбасары Сұлтан Камалетдиновтың жұмылдыруға дайындық жоспарын ұйымдастыру мен жұмылдыруға дайындықтың жай-күйін бақылау және әскердің дайындығы, ТЖМ Азаматтық қорғаныс және әскери бөлімдері комитеті төрағасының міндетін атқарушы Алексей Советовтың азаматтық қорғаныс саласын заңнамалық қамтамасыз ету туралы, сондай-ақ денсаулық сақтау министрінің орынбасары Тимур Сұлтанғазиевтің жұмылдыру резервіндегі дәрілік заттар мен медициналық бұйымдарды бөлу функциясын іске асырудағы проблемалық мәселелер туралы баяндамаларын тыңдады.
Сенатор Андрей Лукин дөңгелек үстел отырысын қорытындылай келіп, онда айтылған ұсыныстарға егжей-тегжейлі талдау жасалатынын және мүдделі мемлекеттік органдармен пысықталатынын атап өтті.
Источник: qazaq.asia
