257 rob
Фотосурет: Қарағанды облысының әкімдігі
Қарағанды облысында 5,9 шақырым қорғаныс бөгеттері мен қорғандары тұрғызылып, нығайтылды, өзен арналарының 44 шақырымнан астам қауіпті учаскелері тазартылды, деп хабарлайды DKNews.kz.
Өңір басшысы Ермағанбет Бөлекпаев су тасқыны кезеңіне дайындық туралы қызметтердің баяндамаларын тыңдады.
Облыстық ТЖД бастығы Мұрат Қатпановтың мәліметінше, тәуекелі жоғары аудандарға Бұқар Жырау, Қарқаралы, Шет, Нұра, Абай және Осакаров аудандары жатады.
– Орта деңгейге – Ақтоғай ауданы, Қарағанды және Теміртау маңы. Балқаш, Приозерск, Шахтинск және Саран су тасқыны қаупінің шамалы деңгейіне жатқызылды, – деді Мұрат Қатпанов. – Қазгидрометтің мәліметінше, Бұқар Жырау ауданының аумағын қоспағанда, облыс бойынша топырақтың күзгі ылғалдылығы нормадан жоғары. Топырақтың қату тереңдігі 63-тен 116 см-ге дейін.
Өңірде 7,9 шақырым су бұру каналдары салынып, жөнделді, 17,5 шақырым дренаж және су бұру жүйелері тазартылды. Автожолдардың 66 учаскесінде су өткізу қабілеті артты.
Бірақ ауа-райының ауытқуларынан ешкім сақтандырылмаған, деп атап өтті Ермағанбет Бөлекпаев. Ол су тасқыны қаупі бар аудандардың әкімдерін қырағылық танытуға шақырды.
– Өзендердегі су деңгейін, қардың көлемін, топырақтың қату тереңдігін бақылауда ұстау қажет, – деп атап өтті Ермағанбет Бөлекпаев. – Қарды уақытында шығарып, тұрғындармен профилактикалық әңгімелер жүргізіп, оларды аула аумақтарын тазартуға шақыру қажет. Инертті материалды, қапшықтарды дайындау, техниканың дайындығын қамтамасыз ету қажет.
Источник: qazaq.asia
