Қазақстанда табысы азық-түлік себетінің құнынан да төмен халық саны артты, деп хабарлайды LS.
2025 жылдың III тоқсанындағы деректерге сәйкес, Қазақстанда бір миллионнан астам тұрғын ең төменгі күнкөріс минимумынан төмен табыспен күн көріп отыр. Аталған сан жалпы халықтың 5,3%-ын құрайды. Соған қарамастан, бір жыл ішінде аз қамтылғандар саны 0,3%-ға азайған.
Ұлттық статистика бюросының деректеріне сәйкес, кедейлік деңгейі ең жоғары өңір – Түркістан облысы. Мұнда 194 мың адам немесе өңір халқының 9%-ы кедейлік шегінде өмір сүреді. Дегенмен бұл көрсеткіш өткен жылмен салыстырғанда 2,9%-ға төмендеген.
Одан кейінгі орындарда Маңғыстау облысы – 8,2% немесе 66,7 мың адам (+4,5%), Абай облысы – 7,9% немесе 47,2 мың адам (-8,9%), Жетісу облысы – 7,7% немесе 53 мың адам (-6%).
Кедейлік деңгейі ең төмен өңір ретінде Астана қаласы тіркелді: мұнда бұл көрсеткіш 2,7% немесе 44,1 мың адамды құрайды. Алайда елордада кедейлік шегінде өмір сүретін тұрғындар саны бір жылда 3,2%-ға артқан.
Қарағанды облысында бұл көрсеткіш 3,3% (37,7 мың адам, -0,2%), ал Атырау облысында 3,3% немесе 23,8 мың адамды (-7%) құрады.
2025 жылдың үшінші тоқсанында бір тұрғынның орташа айлық тұтыну шығыны шамамен 110 мың теңге болған. Бұл дерек елде бір миллионнан астам адамның ең қажетті шығындары табысынан екі есеге жуық артып отырғанын көрсетеді.
Сондай-ақ, ведомство күнкөріс минимумынан төмен табыспен өмір сүретін отбасылардың құрылымына қатысты мәліметтерді жариялады. Анықталғандай, 1,1 млн аз қамтылған қазақстандықтың 890,4 мыңы бес және одан да көп адамнан тұратын отбасыларда тұрады, бұл көрсеткіш өткен жылмен салыстырғанда 3%-ға азайған.
Төрт адамнан құралған отбасыларда 141,1 мың адам тұрады, бұл өткен жылмен салыстырғанда 39%-ға көп. Үш адамнан тұратын отбасыларда 29,2 мың адам тіркеліп, бұл көрсеткіш 31,2%-ға азайған. Екі адамнан құралған үй шаруашылықтарында 15,2 мың адам өмір сүреді, бұл өткен жылмен салыстырғанда 18,8%-ға төмен. Ал бір адамнан тұратын үй шаруашылықтарында 2,6 мың адам тұрады, бұл бір жыл ішінде 7,9 есе артқан.
Бұдан бөлек, елде айына 33,5 мың теңгеден де аз табыс табатын, яғни азық-түлік себетінің құнын да өтей алмайтын 57,9 мың адам бар. Бұл көрсеткіш бір жыл ішінде 28%-ға өскен.
Мегаполистерде кедейлік деңгейінің айтарлықтай өскені тіркелді. Атап айтқанда, Шымкентте кедейлік шегінде өмір сүретін тұрғындар саны екі есеге жуық көбейіп, 11,6 мың адамға жеткен. Ал Алматыда бұл көрсеткіш 1,5 есе артып, 11,1 мың адамды құрады.
Источник: lsm.kz
