Жүзден жүйрік атанғандарды өңір басшысы Ермек Маржықпаев марапаттады. Сондай-ақ, салтанатты жиында жергілікті зиялы қауым өкілдері мен кәсіпкерлерге «Халық алғысы» және «Тәуелсіздіктің 30 жылдық» мерекелік медалі табысталды.
Егемен елдің қалыптасуы мен өркендеуіне атсалысқан жандар көп. Олар түрлі салада тер төгіп, еңбек етуде. Салтанатты жиында облыс әкімі сол жандардың ілкімді істерін атап өтіп, «Тәуелсіздіктің 30 жылдық» мерекелік медалімен марапаттады.
Бұдан бөлек, халықтың алғысына бөленіп, батасын алған жандарда ескерусіз қалмады. Жеке кәсіпкерлер мен медицина саласының қызметкерлеріне «Халық Алғысы» медалі табысталды. Пандемия тұсында жұмыстары екі еселенген ақ халатты абзал жандарға құрмет көрсетілді.
Сондай-ақ, «Жомарт жүрек» жобасы аясында «Жыл меценаты», «Туған өлке», «Жылдың үздік қамқоршысы», «Жыл тұлғасы» номинациялары бойынша жергілікті меценаттар марапатталды. Ал, Құлагер байқауы бойынша «Үздік проза», «Үздік поэтикалық шығарма», «Үздік публицистикалық жұмыс», «Үздік ғылыми-зерттеу жұмысы», «Шағын сәулет нысанының эскизі», «Үздік телесюжет» номинацияларының жүлдегерлеріне алғыс хат пен ақшалай сыйақылар табысталды.
