Домой Новости области Елордада ақмолалық тауарөндірушілердің жәрмеңкесі өтті

Елордада ақмолалық тауарөндірушілердің жәрмеңкесі өтті

318
0

Өткен демалыс күндері елордада ақмолалық тауарөндірушілердің жәрмеңкесі өтті. Оған екі жүзден астам кәсіпкер қатысты. Бұл биылғы жылдың соңғы жәрмеңкесі. Осыған дейін еліміздің барлық өңірлері кезекпен барып, Нұр-Сұлтандықтарға өз өнімдерін ұсынған болатын.

Ақмола облысының жәрмеңкесі биыл астаналықтар үшін ұйымдастырылған 14-ші сауда-саттық болды. Таңмен таласа сауда орнына ағылған елорда тұрғындары қажетті өнімдерін қолжетімді бағамен ала алды. Іс-шара әлеуметтік маңызды азық-түліктердің бағасын тұрақтандыру мақсатында ұйымдастырылған.

Ақмолалықтар елордаға жалпы сомасы 400 миллион теңге тұратын 500 тонна өнім апарған. Орташа есеппен баға нарықтағыдан 15%ке төмен болды.

Жылқы етінің бір келісі 2200 теңге болса, сиыр еті 2000, қой еті 1900, ал үйректің еті 2 жарым мың теңгеден сатылды. Пісірілген шұжық 1400 теңге болса, картоптың бағасы 140 теңге деп қойылды. Тұтынушылар 1 литр сүтті 230 теңгеден, 30 жұмыртқаны 1200 теңгеден ала алды.  Ақмола облысының тауар өндірушілері елорданың сауда нысандарымен жыл бойы әріптестік қарым-қатынаста.

Жерлестеріміз елордалықтарды ауыл шаруашылығы өнімдерімен ғана емес, өңір әртістері әзірлеген концертпен де қуантты. Статистикалық мәліметтерге сүйенсек, мұндай жәрмеңкелерге тұрғындардың үштен бір бөлігі келеді екен. Бұл жолы да ауа-райының қолайсыздығына қарамастан жәрмеңкеге келген халықтың қарасы қалың болды.

Если вы хотите поддержать Kokshetau.asia, то вы можете сделать перечисление на любую сумму